სტალაქტიდებისა და სტალაგმიტების გასაოცარი ნაღვენთი ფორმებით მორთული კარსტული მღვიმე, კიდევ ერთხელ დაგარწმუნებთ ბუნების უსაზღვრო შესაძლებლობებში. „გაქვავებული ჩანჩქერები,“ „დაკიდებული ქვის ფარდები,“ ჰელიქტიდები და კალციტის ნაღვენთები მღვიმის დარბაზებში თვალწარმტაც სანახაობას ქმნიან. ვიზიტორებს შესაძლებლობა აქვთ იხილონ „არგონავტებისა“ და „კოლხეთის“, “, „მედეასა“ და „სიყვარულის“, „პრომეთესა“ და „იბერიის“ დარბაზები. მათი დათვალიერება შესაძლებელია 1420 მეტრი სიგრძის საფეხმავლო ბილიკით, ასევე, სანაოსნო ტურით მდინარის ნაკადზე, შთამბეჭდავი ხელოვნური განათებებისა და ლაზერ-შოუს თანხლებით.

გამორჩეული სილამაზის ბუნების ძეგლის ასაკი დაახლოებით 60-70 მილიონი წელია. ის სოფ. ყუმისთავის ტერიტორიაზე 1984 წელს მეცნიერებათა აკადემიის ექსპედიციის წევრებმა ჯუმბერ ჯიშკარიანმა, ამირან ჯამრიშვილმა, ვახტანგ კაპანაძემ და თამაზ ქობულაშვილმა აღმოაჩინეს.

პრომეთეს მღვიმე მსოფლიოში უნიკალურ ძეგლად იქნა აღიარებული, რადგან უდიდესია განზომილებით, გამკვრივების მრავალსახეობით, მიწისქვეშა მდინარეების მნიშვნელობითა და პეიზაჟის მრავალფეროვნებით. განუმეორებელია არქიტექტურული დარბაზების მოცულობითაც. სულ წარმოდგენილია 22 დარბაზი.

პრომეთეს მღვიმის 1 საათიანი მარშრუტი არგონავტების, კოლხეთის, მედეას, სიყვარულის, პრომეთესა და იბერიის ზღაპრულ დარბაზებს გაივლის და ვიზიტორთა სურვილისამებრ, ქვეითი ან სანაოსნო გზით, მღვიმეში მდინარე ყუმის გამდინარე ნაკადზე 15 წუთიანი გასეირნებით მთავრდება.